thi anarchist hert
whit measure whit gauge
whit dictat tae yaise
tae define thi range
o thi anarchist hert
*
ah wd tak but a few days
lay thum aside ur breath n say
this ainly thi time wi hae
tae roam faur fae mi
n ah wd tak but a few miles
put thum aside ur flesh awhile
tell ur thi distance manner n style
o thi journey tae tak fae mi
*
n she wd lea ony way
ritirn eventually wae unco tales
o dreams n visions n lovers gay
o Ithir warls glimpsed green
thru gless wombed waves paused
afore brekkin
o grieving mid day moons sinkin
ahin distint moontins
n me a mere sometime thocht
*
n fash nocht fash nocht
thi anarchist hert wd say
this time ahll stay
me freen ma brother
ma sang ma stutter
ma clarity ma clutter
ma thur kin nivir be another
ma comrade ma lover
ma comrade ma lover
ma comrade ma lover
ma comrade
ma
lover
tae embrace thi belly n breist
tae embrace thi belly n briest
ae thi auld year deein
thi heat ae final flames runnin backwards
up spittin hissin wid
rain blesst end wurds speak
tae clarinet n didge drums n bassoon
wae poetry sangs stories n haverin
n thi licht bangs amangst
spiral tree taps then zaps
oour the A814 whur yin week afore
we danced agin genocide patriachy n capitalism
thi bath
held fast bi black sinews o nicht
het bi rid n yella flame
thi bane white bath draws cool air aff
thi rain fat burn ablaw
thi glistnin ae thi caunil chittirs
burns n blaws horizontal n swift
maks shadaes lowp n jig amangst
steam n smoke fringed
wae leaf n twig n irth n heaven
ben thi mists marrow pink ah lay
heezy limbs n fingurs ripplin saft yon ocean till
thi bath iz flesh drookit wet
slips n sooks ma ilka motion in
deep n deeper
aneath thi broken pier
sleepnear yit sleepliss stuhll wi tak oorsels aneath thi broken pier
whur wanst thi ferries bertht n left linking city n islands
whur gaelic govan met finnieston thru tae pertick
n scullery sweat n faktray stoor geed waye tae simmirs ferr
noo a hades a symmetric beams claithd in myrid broons
blacks n greens o plants whae reek o ile n tar
n haud firm tae rivits rustit tae shapes n colors o keech
there amang wahtur dull sundarts dreich n air dumb n deef
wi fun a grief o trees bane pale n curved lik limbs n torsos
o dragons n unicorns lang droont sailors n sorrows clutch n cluttirt
atween liguid n solid n photon thin nuhhin distracts thi magic weavin
black river tae tree trunks o histories n futures o sinews n skins
balancin canny oour thi tides watchin persephone sing
mozart tae thi clyde n thi clyde replyin pitch perfickt
by thi gairloch
cauld n queer thi lichts thit glaw fae faslane naval base
barb wire n security genocide encased in concrete
n steel n orders n properly fallyed procedures
yit ilka 'oor thit passes us flashes wae teeth n lips smilin
ti thi crack thi tales thi gallus lies thi languid love
contently sighin apon the airs breath
n thi benns it gloamin ur nocht but a reek o colors
echoes o irth n blossom fused to smoke afore
thi bleerin sun deein ti tales o india
telt apon thi gairlochs shores
joy is treason tho in a warl whur its ainly propur
tae remain door n dry n soor faced
tae haud fear to yir briest lik a bairn seekin comfort
whur sorrow is obligatory n thi legislation necessary exists to ensure it is so
let us then commit an act o treason
let us bring buckie n blaw tae thi war machine
let us love waeoot askin permission
let us sing wae neither rhyme nor reason
live simply tae enjoy thi fact o livin
ti bi gallus n braw n stuhll n forgivin
let us commit an act o treason
let us commit an act o treason
